territorios

gaiak

Baserritarren segurtasuna

:: ARANTZA URRETABIZKAIA.

Udako egunotan plan bat jarri dute abian gobernatzen gaituzten erakundeek baserrietan bizi direnen segurtasuna sustatu nahirik. An- tza denez, gero eta maizago gertatzen dira lapurretak herrietatik kanpo bizi direnen etxeetan, baserri nahiz txalet.

Segurtasunik eza izan daiteke aurrerabidearen truke ordaindu behar dugun preziorik handiena, hirian nahiz mendian. Baina esaldiaren bi puntuak aintzat hartu behar dira, aurrerabidea eta segurantzarik eza.

Nik txikitan ezagutu nituen baserrietan ez zen apenas lapurretarik gertatzen. Edo hori esaten dit memoriak. Nik duela mende erdi ezagutu nituen baserritarrak, gure familiakoak eta haien ingurukoak, ez ziren lapurren beldur, ez zuten arrisku horri buruz gauza handirik esaten. Besteak beste, baserri haietan ez zegoelako zer lapurtu.

Nik txikitan ezagutu nituen baserriak pobreak ziren, are hirian pobreziatik hurbil geundenontzat ere. Pobreak eta atzeratuak. Ez zuten komunik eta urak bi iturri zituen, bata sukaldean eta bestea ukuiluan. Ez zuten autorik ez txirrindurik. Han lapur zitekeen gauza bakarra sukaldeko irrati zaharra zen, etxea bera sarritan ez baitzen baserritarrena.

Irratia eta jakiak, eta horixe lapurtzen zuten baserri haietan, oiloren bat, ukuilu ondoan zeuden txorizo eta urdaiak edo ganbarako sagar eta patatak. Horixe lapurtzen zuten baserritarrak bezalaxe etxez etxe oinez mugitzen ziren lapur haiek.

Gaur, berriz, inork ez du uste baserritarrak pobreak direnik. Eta guztiok dakiguna, lapurrek ere badakite, bertakoek eta kanpotik etorritakoek. Horregatik egiten diete eraso baserriei, babes gutxiago dutelako eta bertan zer lapurtu badagoela jakin badakitelako. Are gehiago, baserri askotan hiriko etxeetan baino zer lapurtu gehiago dagoela pentsa- tzen dutelako.

Gauzak horrela eta hirietako segurtasun eskaerak zalaparta gehiago egiten badu ere, ondo egiten dute agintariek baserrien segurtasuna sustatzen saiatzen direnean. Modu horretan saihestuko dugu auto-defentsaren arriskua, justizia gizabanakoaren esku uzten duen defentsa modu gaizto hori.