territorios

gaiak

Manifestu haserretua

:: JAVIER ROJO.

Azken hilabete hauetan ikusi dugu nola 'indignatuen' taldeak nonahi sortzen diren. Hasiera batean ematen zuen demokrazia zuzenaren aldeko taldeak zirela, eta halako anarkismo asanbleario zehaztu gabean kokatzen ziren. Gure inguruan erabili ohi den ordezkari-demokraziaren ordez, bestelako demokrazia nahi zuten, alderdi politikoak alde batera utzita, 'benetako demokrazia' eskatuz. Sistemaren kontra daude, sistema zer den zehazten ez delarik. Baina 'indignatuen' taldeek hasierako muga horiek gainditu dituzte eta gertakari oso zehatzei lotutako kaltetuen taldeak bihurtu direla ikusi ahal izan dugu. Gure artean, unibertsitatean sartzeko hautaprobetan kimika azterketarekin gertatutakoa horren adibide ikusgarria da. Indignatuen mugimendu hauek jatorri bat dute: Stéphan Hesselek Haserretu zaitezte! izenburuarekin idatzitako liburuxka bat, inolako esanahi peioratiborik gabe panfleto izena merezi duena. Hasselek 93 urte ditu, eta datu hau ez da garrantzi gabea bertan esaten dena bere testuinguruan ulertzeko.

Liburuxkan idazle honek adierazten du ez dagoela ados munduan gertatzen diren gauza askorekin eta erresistentziarako aldarrikapena egiten du. Jakina, erresistentzia horretarako oinarriren bat egon behar da eta berak abiapuntu hori haserrean ikusten du. Norberak bilatu behar du zerk haserretzen duen eta hori izango da berarentzat erresistentziaren oinarria. Idazlearen biografia jakin gabe ezin daiteke liburu honetakoa ulertu: Alemanian jaiotako judua izanik, 20ko hamarkadan Frantziara joan zen bizitzera. Bigarren Mundu Gerran De Gaulle-ren jarraitzailea izan zen eta erresistentziaren partaidea. Zenbait kontzentrazio-eremutatik pasatu ondoren gerra bukatu zenean Nazio Batuetarako lan egin zuen besteak beste Giza Eskubideen Deklarazioa egiten. Gauzak honela uste dut liburuan hiru puntu nabarmentzen direla. Alde batetik, bere esperientzia pertsonal honen argitan azaltzen du gaur eguneko erresistentziarako aldarria.

Bigarrenez, terrorismoaz hitz egiterakoan, etikatik urruntzen du gaia eta eraginkortasunaren ikuspuntutik azaltzen du; alde honetatik begiratuta, terrorismoak bilatzen duenaren kontrako efektua lortzen duela azpimarratzen du. Eta bukatzeko, idatzizko deklarazioei garrantzia handia ematen die, ida- tzizko hitzak ia botere magikoa izango balu bezala. Ez da 'Manifestu komunista', baina komenigarria da liburu hau irakurtzea.